تصحيح معلومة ان سمك التونا والسردين والماكريل خطر على الحوامل وخطر عموماً على الصحة للأسف ، أصبح أغلب الناس بياخدوا معلوماتهم من الفيسبوك زى ما يكون كتاب موسوعة علمية موثقة.

للأسف ان خبر واحد غلط بيتعمل له شير و بينتشر كالنار فى الهشيم اكتر كتير من تصحيح الخبر ، لإننا بنحب نتفرج عالحريقة وأغلبنا بيمشى لما المطافى بتوصل.

عموماً كل فترة كده بيطلع نفس الخبر بتاع ان التونا فى مصر مصدرها وحش وانها خطر على الصحة و ملوثة. و طبعاً ، بسبب نظرية المؤامرة اللى قربنا أغلبنا نتخذها ديناً ، وبسبب ضعف الثقة فى نظامنا الرقابى على جودة أى منتج (مع إن كل الدلائل بتؤكد عكس كده ، على الأقل مؤخراً) ، بسبب ده كله ناس كتير بتبدأ تنشر الخبر بطريقة رهيبة الى ان تبدأ الصحف – و خصوصاً الإلكترونية منها – فى نشر الخبر و تبدأ بعض قنوات التلفزيون الضعيفة فى تداول الخبر أيضاً …. و هنا يتحول الموضوع الى مرحلة أعلى كتير من الإنتشار. فيصبح من المسلمات ، و من ينكره هو من ضعيفى الثقافة و الإطلاع.

المهم ، لأن عملى كأستاذ فى التوليد و أمراض النساء كان دائماً يضعنى أمام المواقف دى مع سيدات خايفين على صحة حملهم ، تعودت على مراجعة مصدر أى خبر مماثل ، وخصوصاً مراجعته من المصادر العلمية المحترمة، مش من الفيسبوك و انستاجرام الخبر زى ما قلت قبل كده بيظهر فى السوشيال ميديا كل كام شهر او سنة تقريباً ، و بيقول ان نوع التونة المعلبة فى مصر (سمك تونا تايلاندى إسمه كاتسوانوس بيلاميس أو المعروف كمان بإسم غير علمى اللى هو سمك السكيب جاك) ده خطر على الصحة عشان فيه نسبة عالية من الزئبق الذي يسبب تسمم مزمن و عيوب خلقية فى الأجنة … و حاجات كتير كده ملهاش أى دليل علمى طيب الحقيقة ايه؟

اولاً : كل الأسماك ، من كل البحار ، تحتوى على بعض التلوث بالزئبق ، لكنها درجة منخفضة لا تضر. الا فى حالة الأسماك الكبيرة التى تأكل كميات كبيرة من السمك الأصغر ، فيصبح تلوثها بالزئبق أعلى ، مثل سمك القرش و السردين او التونا الكبيرة (غير المعلبة) وبعض أنواع التونا المعلبة التى نادراً ما نجدها فى السوق المصرى أصلاً.

ثانياً : النوع ده تحديداً فى سمك التونا ، (إسمه – تانى برضه – هو كاتسوانوس بيلاميس أو سكيب جاك بالعامية الإنجليزية) من بين الأنواع التانية ، اللى أصلاً نادر بيعها فى السوق المصرى ، هو سمكة صغيرة إلى متوسطة الحجم و بالتالى لا تحتوى على نسبة تلوث كبيرة من الزئبق.

ثالثاً : نفس الكلام ينطبق على سمك الماكريل و السردين المعلب والجمبرى و الإستاكوزا … و طبعاً السمك الطازج العادى اللى أغلبنا بنحب ناكله. كل الأنواع دى نسبة الأمان فيها مطمئنة جداً ، خصوصاً لو هناكل منها مرة أو مرتين أسبوعياً بالكتير.

يعنى ممكن الحوامل و الأطفال والناس كلها فى مصر ياكلوا تونا معلبة عادى؟ الإجابة بإختصار شديد : طبعاً ممكن … و خصوصاً لو كانت من النوع الأوسع إنتشاراً فى السوق المصرى (آخر مرة إسمه كاتسوانوس بيلاميس أو المعروف كمان بإسم غير علمى اللى هو سمك السكيب جاك) وخصوصاً لو معمولة بملح قليل أو عالأقل قبل الأكل نفضيها فى طبق و نغسلها بالماء الجارى …

و طبعاً يفضل جداً التونا المعلبة فى قطع كبيرة (و ليست المفتتة) لإنها بتكون من القطع الأنظف فى لحم السمكة. و يفضل بمعدل معقول ، يعنى مثلاً ٣ علب تونة فى الأسبوع ، مش فى اليوم.

حبيت أوضح الموضوع بقدر المستطاع ، و إلى أن نلتقى فى تصليح تهبيدة جديدة من إشاعات الصحة و الحمل، أنا حاطط بعض المصادر المحترمة فى نهاية البوست …

https://www.fda.gov/food/consumers/advice-about-eating-fish

https://www.london-gynaecology.com/avoiding-foods-during

https://www.healthline.com/nutrition/mercury-in-tuna